الشاعر / بدر عبيد الحربي .
يا باشة الغيد ياهنعه ياعطبوله
كفي عذابك عن اللي جزل بفعاله
إلا إذا انك على التعذيب مجبوله
الله يعينه ويسحب عنك أقواله
بيبان قلبي عن الخفرات مقفوله
فتحتي بيبانه وكسرتي أقفاله
معقولة اللي حصل لا ماهي بمعقوله
يوم اخترقتي فؤاد معربٍ خاله
شيبت عيني وطارت فيك مذهوله
تقول لك سيبي فوادي على حاله
والحظ صامد ووقف لك على رجوله
وجوك الفزع معه رجليه وخياله
عزالله انه وقف معكِ على طوله
في يوم له فال فال الله ولا فاله
كنتي عن القلب والعينين مجهوله
جهلك قلبٍ جهل حله وترحاله
وصرتي على قلبي المشغول مشغوله
على عذابه طوال الوقت شغاله
وكل ما تسويه فيني قلت مقبوله
نكسب رضاكِ مثل مانكسب الطاله
عنهن ذوات الجمال أنتِ يا مجموله
الزين عنهن شربتي كيف فنجاله
عيون فيها الظفر و امواق مهبوله
أهداب فيها الخطر ورموش قتاله
بين الظفارة وبين هبال مخبوله
يذبح ظفرها وتذبح فعلت هباله
بعيونك الناعسة أهداب مذبوله
كن السهر في هدبها حطت ارحالها
وشفايف بثغرك من الريق معسوله
ياليت حظي ولو رشفة من بياله
والجيد ياحظه اللي عانق لطوله
ياليت ربي عطاني بخت سلساله
والشعر الاسود سواد الليل بسدوله
خلف القمر تسحبين الليل بسداله
وخصرٍ عليه الكفوف تضم مقغوله
الله يعينه وكلٍ يسخف لحاله
مقاسم الأحجام باللي تحته حموله
من فوق فخذٍ معه شيال لحماله
سبعة وسبعة عليهن سبع مدبوله
بالظبط نص الوزن بالظبط شياله
رزانة الرجل في خطوات مثقوله
عنهن تمايل من الارداف مياله
مياسة القد والسيقان مفتوله
قوام جسمٍ تناسيقه ومنواله
_________________________________________
المحتوى أعلاه يتم نشره عبر حسابات المجلة ادناه تفضلوا بالمتابعة :
تويتر :
فيسبوك :
سناب شات :
https://www.snapchat.com/add/shababeksglob19
انستقرام:
https://instagram.com/shababeks1?r=nametag
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار المنوعة الدخول : http://www.shababeks.com

