خشب في خشب ..”محمد” حول بقايا الأخشاب والكراكيب لتحف فنية من شرفة منزله

مجلة شبابيك العالمية.

الهواية لا تعرف مرحلة عمرية معينة، وهذا ما ينطبق على محمد منصور صاحب الـ 42 عامًا، الذي بدأ في استغلال بقايا الأخشاب القديمة في تصنيع التحف الفنية والإنتيكات والمجسمات الخشبية في شرفة منزله، التي حولها لورشة لصناعة التحف الخشبية، وقال محمد منصور : بعد ما تخرجت من كلية التجارة بدأت العمل في الكثير من المهن المختلفة، آخرها الخشب وبعدها بدأت أفكر استفيد إزاي من بقايا الخشب، وبدأت أنفذ حاجة جديدة وهي أن أصمم مجسم بسيط وإللي عجب الناس وده شجعني أستمر أكتر”.

محمد حول شرفته لورشة :
تابع:” حولت بلكونة بيتي لورشة وبدأت أشتغل ثلاث ساعات في الساعات، ونفذت أشكالًا مختلفة من الخشب، ولكن بعد فترة بدأت أدخل نوع من بقايا البلاستيك لكن مش بصورة دائمة، لأني حابب يكون الخشب هو رقم واحد في شغلي، وصممت منه بيوت ومجسمات صغيرة”.

وأضاف: صناعة التحف والمجسمات هواية جديدة عندي اكتشفتها من 10 شهور، لكن حابب أكمل فيها بشكل دائم وأطور منها أكثر، وبرغم من إني مدير حسابات بإحدى شركات الأخشاب، لكن كنت حريص على إني أوفر من وقتي 3 لـ 4 ساعات بعد الشغل، وأمارس هوايتي إللي بعتبرها مصدر دخل تاني ليا”.

وأوضح:” أنا بحب الهاند ميد لكن مكنتش فاكر أنه ممكن يكون مصدر رزق إضافي ليا وبحاول أبدع فيه، رغم أنه شغله متعب جدًا وبياخد وقت طويل يعني تصميم مجسم أو قطعة أنتيكة ممكن تاخد 15 يوم لشهر حسب فكرة النموذج، وكمان فيه تفاصيل كثيرة لازم تبقى موجودة في قطعة الخشب إللي هو الأغلب في شغلي مع قطع بسيطة من البلاستك بستخدمها في تصميم الشبابيك “.