الشاعر : باني شديد الحيسوني .
تباشروا ياهل الولع بيّن سهيل
تجهزوا والطير قرّب هداده
بعد السموم وبعد ذيك الغرابيل
اللي شوتنا مثل شوي الجراده
جو الشتاء جنّا لياله مقابيل
شهرين ماباقي وراها زياده
من بعدها حط الحطب والمعاميل
جاك النسيم اللي يذعذع براده
الظهر ماتطري علينا المقاييل
كلٍ على كيفه ويتبع مراده
ماعاد نبغا بالمدينة مداهيل
نرتاح من كثر الضجيج ونكاده
كل يجهز عزبته والدرابيل
لنا بمرقاب المشاريف عاده
صوب الديار اللي عسى فالها السيل
امشي ولو اني طريح الوساده
دار لها عندي معزة وتبجيل
احبها بالحيل واشهد شهاده
عسى مزون الوسم لاجن محاميل
مزن بياضه مختلط مع سواده
تسري على برقه سواة القناديل
هادي هواه وماشي بالركاده
يصب وبله من صباحه الى الليل
بين الحزوم وبين ذيك الحماده
ماهو شديد ويجرح الأرض بالحيل
رحمه من الخالق رزقها عباده
البر طبٍ للنفوس المعاليل
ويضفي على القلب الحزين السعاده
_______________________________________
المحتوى أعلاه يتم نشره عبر حسابات المجلة أدناه تفضلوا بالمتابعة :
تويتر :
سناب شات :
https://www.snapchat.com/add/shababeksglob19
انستقرام:
https://instagram.com/shababeks1?r=nametag
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار تفضلوا بزيارة موقعنا : http://www.shababeks.com
