Site icon مجلة شبابيك العالمية

(جواب الغيابات)

الشاعر : محمود الصبحي .

مدري متى الملتاع يطرح سؤاله

عبر الظروف القاسية والمسافات

بينه وبين الوِرد دلو ومحاله

ودروب وعره كلها هم وشتات

إن ما وقف محتار داله ف حاله

كيف البصيره ف العمر بعد ما فات

زمان ما غاب الصفا عن خياله

والوقت عيّا يطوي البعد بالذات

كل ما ربط حبل الرشا مع حباله

مالت عليه الساقيه ب المطمات

تبني حواجز عاليه عن وصاله

وتفرض رسوم واقنعه للمسرات

واللي ترك باقي العمر وسط جاله

يوم اقترب عينه على شربة فرات

حتى عصّير يميل فيّ لظلاله

وراعي السفر ينزل على الدرب ويبات

يبل جوف من الضما ما صفاله

غير الأماني الزائفة والمعاناة

لو حالة الفرصه عليه استحاله

يرضا ولا يقطع رجاء ف العلاقات

لكن على حسب الصبر واحتماله

والخاطر المكسور في كل الأوقات

إن ما قدر ياخذ هواه ب سهاله

يلحق مداه ولا يمرّ المتاهات

عند السؤال اللي فلت من عقاله

يموت ما يلقى جواب الغيابات

________________________________________

المحتوى أعلاه يتم نشره عبر حسابات المجلة أدناه تفضلوا بالمتابعة :

تويتر :

سناب شات :

https://www.snapchat.com/add/shababeksglob19

انستقرام:

https://instagram.com/shababeks1?r=nametag

قناة شبابيك :

https://www.youtube.com/channel/UCZbfRIHzi1WyP3_7lHfc0ag

لمزيد من الأخبار تفضلوا بزيارة موقعنا : http://www.shababeks.com

Exit mobile version