الحق والاقناع

الشاعر / إبراهيم ياسين البارقي .

ضاقت على منهو تدعّى بلا داع

بعد الوساع اللي مايملى عيونه

الجامح اللي نذكره في الزمن طاع

واللي إبتسم شفته يصرصر سنونه

ما تعرض الدعوة على كل بياع

ومن باع رايه في الزمن يشترونه

اللي تغنى بالمبادئ والاسناع

كب القيم قدام لا يحرجونه

أثر القناعة عقده لكل طمُاع

لو للرضا كفٍّ يبي يبترونه

الذيب يدفن لقمته كان ماجاع

ولا جاع يضرب بيد ما يمسكونه

ماعاد به راعٍ على حسبته راع

رعاع هذا الوقت هم يرسمونه

بعض الجمر يبغى هوا للتولاع

وللريح باب نسكره ويفتحونه

الحق ماهو سياسة لفن الاقناع

الحق يبغى رجال بس ينطقونه

قد قيل حق اللي يطالب فلا ضاع

وللحق عمر ونور ما يدفنونه

اللي يتأمل كيف ترتيب الاوضاع

يكشف وضوح العلم لو يسترونه

القلب يفقه علم والعقل له واع

واللي صدع علمه فلا يجهلونه

ماعاد اكذُب زحمة الناس في القاع

واللي نزل معهم ترا يدعسونه

وتبقى الحرار تهد من فوق مطلاع

لو عيّبوا هدته مايوصلونه

بنيت سقف الحب من قلب واضلاع

وعيّوا حبايبنا علي يسكنونه

للشوق ريح وبرد تعويبه سباع

ياليت انسام الهوى ينقلونه

________________________________________

المحتوى أعلاه يتم نشره عبر حسابات المجلة ادناه تفضلوا بالمتابعة :

تويتر :

سناب شات :

https://www.snapchat.com/add/shababeksglob19

انستقرام:

https://instagram.com/shababeks1?r=nametag

قناة شبابيك :

https://www.youtube.com/channel/UCZbfRIHzi1WyP3_7lHfc0ag

لمزيد من الأخبار المنوعة الدخول : http://www.shababeks.com