الشاعرة / منتهى القريش .
ويش فيك؟
ضاق صدرك بين ايديك؟
طيب اسمع ويش يقول
وانتبه له..
هذا صوته..
والا صوتك؟!
والا ذي ضجة سكوتك؟
قوم غن..
لا تسيء الظن
في نبض الحزن
الوجع لك
والفرح خله لـ أهله
ويش فيه همك؟
علمك معنى السكوت؟
داخلك تقدر تموت
ولا حدا مرك درى بك
كود ما ينفع عتابك
لا تصحي صوتك اللي
نام في زحمة حنينك
إنت وينك؟
نام جنب الجرح صاحي
واترك الجرح ابـ محله
امسك الشهقه بـ ايدينك
شوف عينك..
السحابات اللي ابـ سماها
جف ماها
ويش بلاها
اعتراها الحزن حتى
كنها إنسان متعب
في هجير القيض يمشي
وتتبع الحسرات ظله
ويش فيه دربك
من تعثر بك..غدر بك
لا مدى يوسع حنينه
التبس شكه ابـ يقينه
وكل خطوه لك عليه
تلتفت رجفه وخوف
عميا..يمكن ما تشوف
الدروب البيض الـ(تمشي) عليها..
تنحسب غلطه،وزله..!
عيش وحدك..
كن معك وأحيان ضدك
افتح ايدينك مواني للسلام
لا تنام
إلا والبسمه وساده
خذها عاده
يمكن تحس بأمان
انسى روحك
انسى ماضيك اللي كان
وحتى لو نبضك سأل
ويش حصل؟!
اصحى قلبك يعترف له
ويش فيك ساكت؟
افتحه شباك صدرك
واطلق الزفرات يمكن
في المدى يرحل سكوته
كن حياته ولا موته
واسمعه لو راد يحكي
انتبه له..
وكون فاكر
الوجع لك..
وللفرح ناسه..وأهله..!!
……………………..
(*)شاعرة، وكاتبة سعودية.
_ اللوحة:للفنان/بندر المسيعري، عضو مؤسس مجموعة الخمسين للفنون بالعلا.
