الشاعر / عبد الله ناصر السبيعي .
أنا عاشق شعوري من ورق وضلوع صدري ناي
أقول الشعر وارزّ علمه و ارعى مرابيعه
أقول بكل مرّة ماني مغنّي على ليلاي
أنا أكبر من مشواير الغرام ومن مواضيعه
وإذا قام الحنين يسوق قلبي قمت أسوق خطاي
ادوّر من دروبك درب قد جيناه واضيعه
ياكثر صورك اللي ما نساها بالي النسّاي
لو ان عمري معك مرّت سنينه مثل أسابيعه
حبيبي كيف امرّ بشارعك ما تدري اني جاي ؟
وأنا أعرف الصباح اللي يجيبك من ذعاذيعه
يا سحر آخر قصيدة في عيون الشاعر الغوّاي
يا وجه مستعد أعيش عمري في تقاطيعه
أمانه لا تغرّك مرحباي وضحكة محيّاي
ترى دربي مثل رمشك طويل وضيعتي ضيعه
تركت وجيه خلاني وراي وجيتك من اقصاي
وأنا بعض الوجيه اليا شريته ما قدر أبيعه
أخشّ اسمك عن أطراف الحديث وتفضحه دعواي
وتهتف له عروق القلب وتجدّد له البيعة
لا تاخذك الليالي والليالي ما هي بشرواي
تداري خاطرك من كل تنهيده وتلويعه
يقولون ان حبيبك ما تهزه حشرجات الناي
واقول بصوت عاشق مابيدّه غير اصابيعه
عفى الله عن حبيبي لو حبيبي ماهو بويّاي
كثر ما اعاند الشوق بغيابه وأرجع اطيعه
عليه من السرور اللي ماهو في وجهي البكّاي
وعليه من السلام اللي ماهو في ليل توديعه
_________________________________________
المحتوى أعلاه يتم نشره عبر حسابات المجلة ادناه تفضلوا بالمتابعة :
تويتر :
فيسبوك :
سناب شات :
https://www.snapchat.com/add/shababeksglob19
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار المنوعة الدخول : http://www.shababeks.com
