الشاعر _ ناصربن مصلح الاحمدي .
برسل كلامي لكاسبين النواميـس•
لللآبـه اللّـي ماحـدٍ ينتقدهـا•
وابدأ بعدهـا واتعـوذ مـن ابليـس•
وبسم الله ابـدأ كلمتـي واعتمدهـا•
وبشرح مشاعر خاطري والاحاسيس•
ببيات شعرٍ ابتدي مـن بعدهـا•
بوصيك يا مشاري على العلم وتقيس•
العلـم مفتـاح العقـول وسعدهـا•
والعلم حلّـلال الأمـور الملابيـس•
حل الحبـال اللّـي تلـوّت عقدهـا•
والجهل لبّاس العقـول الملاحيـس=
والشك طمّـاس العقـول وجهدهـا•
وقيس الكلام واحسبـه بالمقاييـس•
وابعد عـن اللّـي كلمتـه تنتقدهـا•
ولا ترتجي اهل اليديـن المفاليـس•
تلقـى التعاسه في حياتـك بعـدهـا•
وحشّم كبير السن وابعد عن الهيس•
ولاتعتقـد دنيـاك تخلـى كبدها•
وان كان ودك يا بعيـد المراميـس•
خلّك عزيز النفس نفسـك تجدهـا•
ولا تلتفت لاهل الردى والدنافيس•
ولا تقيّـم العالـم بهيئـة جسدهـا•
والهم خلّه بالقلـوب المحابيـس•
والصبر مفتـاح الهمـوم وجلدهـا•
ودنياك لو كـانت عسام و تضاريـس•
اصبـر علـى دنيـاك لا تمتقدهـا•
العقل زينـه والتجـارب مقاييـس•
(وماكـل مـن دوّر لحاجـه وجدهـا)•
وخل المجالس مشرعه بالمحاميـس•
للضيف ولجارك وكل مـن قصدهـا•
واثبت على دينك ولا تطاوع ابليـس•
الدين عصمـه والرجـال بعهدها•
_________________________________________
المحتوى أعلاه يتم نشره عبر حسابات المجلة ادناه تفضلوا بالمتابعة :
تويتر :
فيسبوك :
سناب شات :
https://www.snapchat.com/add/shababeksglob19
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار المنوعة الدخول : http://www.shababeks.com
