الشاعر : أحمد بن فهد .
ترفرف بالجناحين الاماني والحلم ياطير
وانا حلمي مثل طيرٍ يحلق فوق تفكيره
مهاجر تاركٍ عشه معاكس اتجاه السير
ولكن طالت المدّه ولا وضّح معاذيره
صحيح ان الاماني بعضها ماله سوى التفكير
صحيح ان الاماني بعضها طول بتفسيره
وبي سيل الفكر ينمو وعيني ترفض التخدير
يطول السيل في حده ومدّت به مشاويره
تغانمت الزمان وفقت من غيبوبة التصوير
لقيت الصدر من تنهيتته قطّع ازاريره
انا نادم لانه خانني وصفي مع التعبير
وفضلتك على قلبي وقدمتك على غيره
على كثر الكلام اللي نحتّه في صخور البير
على كثر الكلام اللي حكا لك عن اساطيره
اقدم لك هوى صافي والاقي منك التعكير
اقدم لك من افراحي واجني منك تكشيره
كتبتلّك على قنينة الاشواق حبٍ غير
ولكن جزر بحرك صد مدك ساء تقديره
سقيتك من نهر وصلي وغيري شرّبك من زير
وغيري بان لي شره ولا بين ابد خيره
انا انثر بوجهك ورد هو ينفخ عليك الكير
وسكنتك وسط صدري وهو ما قدر الجيره
يعاكس ردك اعيونك وانا مني لك التحذير
مصير الوقت يكشف لك خداعه يوم تزويره
بريد الشوق له قسمين له وارد وله تصدير
جواب البعد بغيابي بيرسل من تقاريره
بشوف ان كان في بعدي على باقي الهوى تاثير
واذا انشل الهوى الاكبر ومات الود بصغيره
لقيتك مثل ما كنتي وطبعك يرفض التغيير
اكيد ان الزمن خالف معا مثلك تباشيره
انا راحل عن اعيونك وانا راحل وش اللي يصير
مدام الدمع من عينك يسوق اجمل تباشيره
يسوقه دايم لغيري وانا مالي سوى التبرير
اشوف البحر والشاطي كم اجرم في قواريره
سلام الله وامان الله على مثلي وفالي خير
كتبت حلمٍ اكبر من هوى الراوي وتعبيره
الا ياطير لك حرية التحليق يالله طير
رعاك الله وانا مؤمن بأن اللي حصل خِيره
وداعية لأن البعد انسب شي للتقصير
كذا افضل على الاحساس والانفاس والحيره
_________________________________________
المحتوى أعلاه تم نشره عبر حسابات المجلة ادناه تفضلوا بالمتابعة :
تويتر :
فيسبوك :
سناب شات :
https://www.snapchat.com/add/shababeksglob19
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار المنوعة الدخول : http://www.shababeks.com
ماشاء الله