الشاعر : طلال حميد الصبحي .
يا منزّل التوبة ويونس والانفال
الواحد المعبود نخشى عذابه
ياهاجسي هات القصايد والامثال
عطني لحونه مثل عزف الربابة
قال الشعر تبشر على الفور فالحال
عندي صحيح القول ماهي دعابة
لا شفت مجلس للرجاجيل مدهال
اعلم ترى راعيه شيخ ومهابة
اعلم ترى راعيه فارس وخيّال
شيّال للبندق نهار الحرابة
مجوّد السيسان عرّاب للخال
راع الكرم والجود من طيب لابه
والمجلس اللي مقفلينه بالاقفال
ابعد عنه لا تقترب من جنابه
وبيتٍ بلا عمدان واوتاد وحبال
لا هبّت الارياح تطوي طنابه
لا تحسبن الجود من كثرة المال
لو كان ماله مثل غزر السحابة
هذي سحابة صيف لو سيلها سال
ما شفت منهو يرتوي من شرابه
ولا جيت مجلس يجتمع فيه عقّال
خليك سامت واستمع للاجابة
ومن لا يثمّن كلمته عند الاقوال
محداً عطاه البال ولحداً درابه
هذا كلام الصدق مايقبل جدال
اسمع كلامي بوسع صدر ورحابة
والباقيات الصالحات من الاعمال
اخير وانفع يوم يعرض حسابه
_________________________________________
المحتوى أعلاه تم نشره عبر حسابات المجلة ادناه تفضلوا بالمتابعة :
تويتر
فيسبوك :
سناب شات :
https://www.snapchat.com/add/shababeksglob19
قناة شبابيك :
https://www.youtube.com/channel/UCZbfRIHzi1WyP3_7lHfc0ag
لمزيد من الأخبار المنوعة الدخول : http://www.shababeks.com