يالاقي الفانوس ابدّ لا تفكّه
وبالهون فركه يمكن المارد ايفيق
واطلب ثلاث من الاماني وحَكّه
ولا تشتكي لي كربة الوقت والضيق
قلّه ابي للريم هالحين سكّه
ابختصر منها تعب قمّة اطويق
ابلتقي وياه من دون شكّه
وايام ياتيبه على صوت تصفيق
غرنوق اعده فالورق مثل الاكّه
وزنه ثقيلٍ فالمشاريع ويليق
وان جيت اوصف في حلاته منكّه
زايد حلاه وميزته حيل ذويق
الزوم من شافه تجي فيه لكّه
وتسمع بصدره ونّته والتشاهيق
والثانيه بيت ومشبٍ ودكّة
مميزن في قبّته والتعاتيق
يطرب له السلطان لو فيه تكّه
ويسمع به الايقاع فنٍ وتنسيق
به مجلسٍ للضيف ابد ما اصكّه
واسمع به الابيات عذب الطواريق
وبه فارسٍ يبطش وينهش بفكّه
يكسر عظام ويبتر الساق ويعيق
والثالثة يدٍ خبيره تشكّه
ماله مكينه او تروسٍ وتعشيق
لا صار كنّه فوق صدري بلكّه
ماعاد ابشكي ضيقتي للمخاليق
اقول له عجل وبالصوت ادكّه
وافي ومن رب السماوات توفيق
ايطير بك ما بين طيبه ومكّه
ابساط ريح ابلا جناحين حليق
اطلب من الله الفرج وسط بكّه
هو شارحٍ ضيق النفوس المغاليق
والمارد اللي طال حبسه وضكّه
في داخل المصباح جنب الاباريق
ماهو بخادم له يبي منه فكّه
مابينهم ثارٍ قديم ومواثيق
حرّر قيوده عند ربعك وزكّه
بيّن جهوده للرجال المطاليق
ثم ودعه قبل الليالي تعكّه
خلّه يطير بعاليات الشواهيق